భోపాల్‌లో అక్కాచెల్లెళ్ల సెక్స్ రాకెట్ గుట్టురట్టు!

మధ్యప్రదేశ్ రాజధాని భోపాల్‌లో అత్యంత దిగ్భ్రాంతికరమైన నేరం వెలుగుచూసింది. ఉద్యోగాల పేరుతో యువతులను ఆకర్షించి, వారిని సెక్స్ రాకెట్‌లోకి దింపడమే కాకుండా బలవంతంగా మతమార్పిడులకు పాల్పడుతున్నారన్న తీవ్ర ఆరోపణలపై ఇద్దరు అక్కాచెల్లెళ్లను, వారి సహచరుడిని పోలీసులు అరెస్ట్ చేశారు. నిందితులను అమ్రీన్, ఆఫ్రీన్ అనే సోదరీమణులు, చందన్ యాదవ్‌గా గుర్తించారు. ఒకప్పుడు మురికివాడలో నివసించిన ఈ సోదరీమణులు, అనతికాలంలోనే నగరంలోని ఖరీదైన సాగర్ రాయల్ విల్లాస్‌లో విలాసవంతమైన భవంతికి మారడం పోలీసుల అనుమానాలకు బలం చేకూర్చింది.

ఈ దారుణం బాధితుల ఫిర్యాదుతో బట్టబయలైంది. ఛత్తీస్‌గఢ్‌కు చెందిన 21 ఏళ్ల బ్యూటీషియన్, భోపాల్‌కు చెందిన 32 ఏళ్ల పనిమనిషి వేర్వేరుగా బాగ్ సేవనియా పోలీస్ స్టేషన్‌లో ఫిర్యాదు చేశారు. ఆదివారం రాత్రి అందిన ఈ ఫిర్యాదులపై తక్షణమే స్పందించిన పోలీసులు, సోమవారం ముగ్గురు నిందితులను అదుపులోకి తీసుకున్నారు. ఈ కేసులో ఆరోపణలు ఎదుర్కొంటున్న బిలాల్, చాను, యాసిర్ అనే మరో ముగ్గురు ప్రస్తుతం పరారీలో ఉన్నారు.

రాకెట్ నడిపిన తీరు ఇది..

నిందితులు ప్రధానంగా ఆర్థికంగా వెనుకబడిన, అమాయక యువతులను లక్ష్యంగా చేసుకునేవారు. నెలకు రూ.10,000 జీతం, ఉచిత వసతి, భోజనంతో పాటు ఉన్నతస్థాయి జీవనశైలి కల్పిస్తామని, ముఖ్యంగా ఇళ్లలో పని పేరుతో నమ్మించేవారు. వారిని నమ్మించి తీసుకొచ్చాక అసలు స్వరూపం బయటపెట్టేవారు. యువతులను బలవంతంగా పార్టీలు, పబ్‌లకు తీసుకెళ్లి మద్యం, ఎండీ డ్రగ్స్ వంటి మత్తుపదార్థాలు అలవాటు చేసేవారు. ఆ అమ్మాయిలు మత్తులో ఉన్నప్పుడు వారిపై లైంగిక దాడులు జరిపేలా విటులను ప్రోత్సహించేవారు.

ఒక బాధితురాలిని 2025 డిసెంబర్‌లో అహ్మదాబాద్‌కు తీసుకెళ్లి, అమ్రీన్ బంధువైన యాసిర్‌తో అత్యాచారం చేయించారు. ఆ తర్వాత బిలాల్, చాను కూడా ఆమెపై అఘాయిత్యానికి పాల్పడ్డారు. మరో బాధితురాలు అమ్రీన్ ఇంట్లో పనిమనిషిగా చేరగా, చందన్ యాదవ్ ఆమెను నారాయణ్ నగర్‌లోని తన సోదరి ఇంట్లో ఒంటరిగా ఉంచి అత్యాచారం చేసి, చంపేస్తానని బెదిరించాడు. ఎవరైనా తప్పించుకోవాలని చూస్తే, వారి రహస్య ఫోటోలు, వీడియోలతో బ్లాక్‌మెయిల్ చేసేవారు.

బలవంతపు మతమార్పిడులు

ఈ రాకెట్‌లో బలవంతపు మతమార్పిడి మరో కీలక ఆరోపణగా ఉంది. బాధితులను ఇస్లాం మతంలోకి మారాలని, బురఖా ధరించి నమాజ్ చేయాలని తీవ్ర ఒత్తిడి తెచ్చేవారు. "నేను ఇస్లాం స్వీకరించాను, నువ్వు కూడా మతం మారితే మంచి కుటుంబంలో పెళ్లి చేస్తా" అని చందన్ యాదవ్ ఒక బాధితురాలిని ప్రలోభపెట్టాడని ఆమె ఫిర్యాదులో పేర్కొంది. నిందితురాలు అమ్రీన్ ఫోన్‌లో పలు అనుమానాస్పద వాట్సాప్ గ్రూపులు, అనేక మంది యువతుల ఫోటోలను పోలీసులు గుర్తించారు. ఈ రాకెట్ గుజరాత్, ముంబై వంటి నగరాలకు విస్తరించి ఉండవచ్చని, ఇది అంతర్రాష్ట్ర ముఠా కావచ్చని పోలీసులు అనుమానిస్తున్నారు.

"బాధితురాలి ఫిర్యాదు మేరకు రేప్ కేసు నమోదు చేశాం. నిందితులను విచారిస్తున్నాం. దర్యాప్తు కొనసాగుతోంది" అని అదనపు డీసీపీ గౌతమ్ సోలంకి తెలిపారు. పోలీసులు రేప్, బలవంతపు మతమార్పిడి నిరోధక చట్టం కింద కేసులు నమోదు చేసి, నిందితుల ఆర్థిక లావాదేవీలు, ప్రయాణ రికార్డులపై దృష్టి సారించారు. ఈ ఘటన రాష్ట్రవ్యాప్తంగా తీవ్ర కలకలం రేపింది.